Nommer 99

DIS mos Afrikaans!

25 Oktober 06

Welkom aan alle nuwe intekenare!

Soos julle hierbo kan sien, is hierdie uitgawe nommer 99. Nou ek beplan iets spesiaals vir nommer 100 met sommer 'n hele paar pasellas daarby!

Ek ontvang een van daardie artikels wat op die internet rondswerf geskryf deur 'n sekere Annelie Botes. Ek wou dit toe hier plaas maar moes haar eers opspoor om toestemming te kry. Na heelwat gesoek spoor ek haar toe op en sy stem in om vir my van haar skryfwerk te stuur, net in geval julle dalk nie weet wie Annelie is nie, hier is hoe sy haarself bekendstel:

Gebore Junie '57 onder die teken van die Kreef op die plaas Grootfontein in die Kammanassie naby Uniondale. Gedoop, geskool, getroud op Uniondale. Behaal in '86 'n onderwyslisensiaat in klavier aan Unisa.
Eerste skryfwerk gepubliseer in die destydse Brandwag toe sy 18 was. Ná jare van stilte begin sy in '94 aktief skryf. Nagenoeg 80 kortverhale het reeds in tydskrifte verskyn. Sy het 7 boeke gepubliseer - Trippel Sewe, Ribbokvoete, Klawervier, Trousseaukis, Raaiselkind en Nawelstring. Klawervier en Raaiselkind het ook verskyn in Engels, Duits en Hollands. Vanjaar het haar koerantrubrieke in boekvorm verskyn as Broodsonde.
Van nering is sy 'n klavieronderwyseres. Maar van Blackjack, Poker en Roulette kan jy haar niks vertel nie.
Ek hou nie van CV’s nie, sê sy. Want CV’s teken net die goeie kant van ‘n mens. En dis oneerlik. Ek het baie foute, en ek steek hulle nie weg nie. Daar is niks omvangryk aan my nie, sê sy. Ek is 'n doodgewone mens wat skinder en huil en 'n overdraft het. Omdat ek 'n Kreef is, is ek 'n huismaker by uitstek. My lewensideaal is werklik om ‘n rustige en versorgende vrou en ma te wees. Maar dit bly my ontwyk. Al in die lewe waarvoor ek nie kans sien nie, is bergklim en bungee-jumping. Die dinge wat my die meeste aantrek in die lewe is kerse, reën, die ruising van die see en om in die middel van die nag wakker te word ná 'n mooi droom. My grootste afkeure is as iemand dink ek is onnosel, as die bergwind waai en wanneer my hande taai is.
Eendag wil ek nog na 'n simfonie-orkes in La Scala gaan luister. En Tibet toe gaan, en kaalvoet in die strate van Jerusalem loop. As ek my lewe kon oorhê, sal ek net een ding verander: Ek sal báie meer op my instinkte staatmaak vir visie en oorlewing.
Dis ek. Niks méér as dit nie. Maar ook niks mínder nie.

So, van volgende uitgawe af kan julle van Annelie se werk geniet!

En dan nog 'n verrassing, 'n ou bekende en geliefde van ons, Minette, gaan uit haar hoekie kruip en spesiaal vir nommer 100 'n artikel skryf! Nog iets om na uit te sien. Julle kan van haar werk hier gaan lees

Ek het verlede keer nie die volledige Vic Valle trippie en die fotos gedeel nie, gaan kyk gerus hier:
http://funkymunky.co.za/vic-falls.html  (Teks in Engels)

Ons is sopas treug van 'n paar dae by Ngwenya Lodge geleë aan die suidelike grens van die Kruger Park. Ons het darem die Groot 5 te siene gekry en 'n hele paar nuwe voëlsoorte identifiseer, net daardie grondpad na Ngwenya gee my nagmerries! Nou is ons darem tuis tot net voor Kersfees wat ons in Kruger gaan deurbring. Bly maar ons gunsteling uithangplek! Kgalagadi en Etosha is kort op Kruger se hakke!

Estelle de Bruyn, verbonde aan die Republikein, die enigste Afrikaanse dagblad in Namibië skryf nou al 'n rukkie vir ons. Ek het al voorheen van Estelle se artikels geplaas, so geniet die een ook! Laat gerus vir Estelle weet dat julle haar artikel gelees het en wat julle daarvan dink, sy hoor graag van julle! Rêrig!

LEDIGHEID IS DIE DUIWEL SE OORKUSSING
Estelle de Bruyn

LEDIGHEID, het die oumense hoeka al gesê, is die duiwel se oorkussing, en daarvan kan ek nou eerstehands getuig.
Wat ’n lui-lekker ledige vakansie in Jan Tuisbly se karretjie moes wees, ontaard toe in ’n holderstebolder bollemakiesie van aktiwiteit.
Soos beplan het die blaaskansie weggespring met ’n gewerskaf in die tuin. My kruietuin se grond is goed bemes en voorberei na aanleiding van die raad wat Johan Wentzel so gaaf was om te gee. Die paadjies in die kruietuin is in pas met die vrede in my siel en gemoed in die vorm van ’n peace sign uitgelê en die tuintjie is beplant soos die Simon & Garfunkel liedjie lui met pietersielie, salie, roosmaryn en tiemie en vele meer.
Soggens met die tweede koppie tee het ek omgestap na die tuintjie en daar gaan sit en die vrede van die voormiddag ingeadem. Tussendeur het ek gelees soos ek lanklaas voor tyd gehad het, middagslapies geniet en nuwe resepte uitgetoets. Tot op ’n dag.
Terwyl ek een oggend in my bedjie lê en die pragtige reënfoto's in Republikein se spesiale reënbylae bewonder, kyk ek om my rond. My oog vang die gehawende toestand van die verf teen die kamermure en die rommel wat oor ses jaar bo-op die hangkas opgegaar het. Tot hier toe en nie verder nie. Vandag is die dag wat ek die spulletjie vir eens en altyd vasvat, kom die gedagte by my op.
Ek pluk die skilderye en foto's van die mure af, trek die spykers uit, gaan koop verf, reël dat Jonas, die wonderlike verwer wat Elsabé aanbeveel, aanmeld en die wiele is aan die rol.
Soos ant Dina destyds gesê het, die een duiwel roep mos die ander. Terwyl ons ons nou in die ongerief van 'n gewerkery in die huis begewe, kan ek net so wel die houtvloer wat ek so lankal in die kamer begeer, laat insit, dink ek so by myself. So gesê, so gedaan, die kamer word ontruim en met 'n inkopielysie wat Klippies opstel, sit ek af na die hardewarewinkel. Saterdag tree die span vloerslaners aan en teen die aand spog my kamer met 'n lieflike Oregon Pine vloer. Dié moet nog geskuur en vernis word.
Dis hier waar die volgende blink gedagte my te binne skiet. Terwyl ons nou gaan stof maak met die skuurdery, kan ek net sowel ook die houtblokkiesvloer in die sitkamer wat vaal is van baie jare se verweer, laat skuur. Twee vlieë met een klap. Ons dra al die meubels uit die sitkamer. Daar is nie 'n vertrek in my huis waar die laaie, kaste, tafels en toebehore van die slaapkamer en die sitkamer nié gepak is nie.
Ondertussen kap Jonas die krake uit, vul dit op, skuur, pleister en verf dat die biesies bewe.
Maandag breek helder en mooi aan en ons is reg vir die skuurdery. Helaas, soos oorle Murphey dit so raak opgesom het: as iets kán verkeerd gaan, sal dit. In die hele Windhoek is daar op dié een dag van die jaar waarop ek 'n skuurmasjien nodig het, nie 'n enkele skuurmasjien te huur nie. Die werk moet met 'n week wag en vir nog 'n ewigheid moet ek die choatiese wanorde van my onderstebo huis oorleef.
En ek sien hoe sit die duiwel met sy rooi spitsoortjies op die gordynkap en kwispel sy stert terwyl hy met sy skerp drietand vurk teen die nuutgeverfte mure tik.
Ledigheid. Dit het jy nou daarvan!

Ou resep
Ek het hierdie nog nie self probeer nie.....

Pofadder

1 vetderm
skaaplewer, in stukkies gesny
knippie sout
12.5 ml peper (1e)
15 ml fyn koljander (2e)
knippie tiemie
12.5 ml Worcestersous (1e)

Dop die vetderm om sodat die binnekant buite is. Krap dit mooi skoon. Meng al die bestanddele behalwe die derm met die lewerblokkies. Stop die vetredm met die lewer. Braai oor die kole.

Dankie, Robert, vir die volgende:

Megajoule poeding

Genoeg vir 10 mense.

1 yskoue blik Idealmelk.
2  x 200gram Cadbury sjokolade.
2 pakke marsmallows.
1 pak tennis beskuit. [opsioneel]
1 flake [opsioneel]

Klits ideal melk tot styf.

Smelt sjokolade en marsmallows. Wenk; gooi bietjie gewone melk by en breek sjokolade in blokkies.
Gooi by styf geklopte melk. Voeg fyngebreekte tennis beskuit by. Wenk: kan ook whispers , ens by gooi.

Roer en gooi in groot bak. Sit in yskas en laat stol.

Strooi Flake oor en geniet die mega joules.

Ek het 'n reisigersforum begin. Enigiemand wat wil gaan rondry of pas teruggekom het van 'n lekker vakansie kan of 'n vraag vra of van hulle vakansie vertel, klik hier en gaan lees wat ander alreeds geskryf het.

Klik ook hier vir GPS koördinate.

Hier is nog een van daai goete wat op die internet rondswerf, dis glo deur Frik geskryf, wonder of dit dalkies Frik Lombaard kan wees?

DIE KOEK deur Frik:

As ek so in die tydskrifte sit en blaai, sien ek dat daar een ding is wat die moderne man die meeste vrees en dit is toewyding. In Engels klink dit vir my half beter en dit is die groot C, naamlik Commitment. Maar een van die dinge met ’n lang geskiedenis wat saamkom is die Troukoek. As julle al ooit gewonder het wat, hoe en waar die troukoek vandaan kom, is vandag dan julle gelukkige dag.

Die troukoek het ’n familiegeskiedenis amper langer as Adam se familiegeskiedenis. Toe die Romeine nog koning gekraai het in die wêreld het hulle koekies gekrummel en die krummels dan oor die koppe van die bruid en die bruidegom gegooi. Dit was gedoen as teken dat die bruid vrugbaar is. Die gaste het dan die krummels opgetel as ’n teken van goeie geluk.

Dit maak nie saak watter geloof jy is nie, of waar jy in die wêreld is nie, jy sal altyd êrens op ’n bruilof een of ander koek sien pryk op ’n tafel. Die koeke het natuurlik begin met klein koekies en later het die mense vrugtekoeke begin bak as troukoeke. Vir baie jare het die vrugtekoek koning gekraai as die troukoek. In ons meer moderne en gejaagde lewe sien ek dat die sponskoek en tot roomyskoeke nou die plek moet volstaan as ’n troukoek. Vir my is ’n troukoek eintlik nie ’n troukoek as dit nie ’n vrugtekoek is nie.

In Victoriaanse tye het hulle linte met gelukbringers (charms) tussen die laag koeke gesit. Elke strooimeisie het dan ’n lint getrek en die gelukbringer sou dan aantoon wat in hulle lewens gaan gebeur. Die een wat die ring getrek het sou dan die volgende een wees wat gaan trou het. Vandag se tyd gooi hulle mos die kousband. Nog een bygeloof is dat jy die boonste laag van jou troukoek moet bêre en as die troukoek dan langer as ’n jaar gaan hou, dan gaan jy ’n gelukkige huwelik beleef. Uit ’n man se oogpunt dink ek dat as jou vrou jou nie binne een jaar met die stuk koek gegooi het nie, is jy vir ’n lang ruk veilig.

Deur die koek saam met haar man te sny toon dan ook aan hoe bereidwillig die vrou is om haar rol as huisvrou te aanvaar. Dames moet my net nie nou afslag nie, maar dit is waar.

Ek kan onthou hulle het ook altyd toe ek jonk was gesê dat as jy ’n stukkie troukoek onder jou kussing sit voor jy gaan slaap sal jy droom met wie jy eendag gaan trou. Ek het dit ook probeer, maar dit het nooit met my gewerk nie, want ek was voor ek aan die slaap geraak het, al so lus vir die stukkie koek, dat ek dit sommer net daar en dan opgeëet het.

In China ontvang die gaste saam met die huweliksuitnodiging ’n stukkie boontjiepastakoek. Jig. Met die troue ontvang hulle darem ’n stukkie eg tradisionele westerse troukoek om te eet. In Liberië is dit gebruik om die troukoek oor die bruidegom se huis te gooi aangesien dit belangrik is vir die sukses van die huwelik. In die Joodse tradisie word die troukoek streng volgens die kosher reëls gebak. Al die toerusting en die tafel waarop die koek staan word geseën. In Duitsland maak hulle troukoeke van sjokoladekoeke. Maar die koeke is swaar gelaai met sjokolade en room.

Maak nie saak waar troukoeke vandaan kom nie, dit is altyd pragtig en lekker. Maar mans, wees gewaarsku, as julle ’n troukoek op ’n tafel sien staan, dan is dit al klaar te laat en dan is die strop alreeds om julle nekke.

Ek het hierdie een nog nie self probeer nie, maar dit klink njammies.. Vir hierdie en nog veel meer soortrgelyke resepte, kontak vir Anna Eksteen en doen navraag oor haar Pa se Boek

TAMATIE-LAMSVLEIS MET KLUITJIES POTJIE

45ml olyfolie
1kg lamsnekskywe, 20mm dik
sout en varsgemaalde peper na smaak
3 uie, in skywe gesny
2 knoffelhuisies, fyngedruk
4 tamaties, geskil en gekap
5ml suiker
375ml vleisaftreksel
3 groot aartappels, in kwarte gesny

Plaas 'n gietysterpot oor matige kole. Verhit die olie in die pot en braai die vleis goudbruin. Voeg geurmidels by. Voeg uie, knoffel, tamaties, suiker en aftreksel by en prut vir 1½ uur. Voeg aartappels by, maak toe en prut vir 'n verdere 30 minute. Maak kluitjies soos hieronder verduidelik, en skep dit bo-op die vleis. Sit deksel op en wag sowat 12 minute. Sit dadelik voor.

KRUIEKLUITJIES

250ml bruismeel
5ml sout
10ml botter
15ml vars of 5ml droë gemengde kruie
1 eier geklits
60ml melk

Sif meel en sout saam. Vryf botter in tot mengsel soos broodkrummels lyk. Voeg kruie by. Klits melk en eier saam. Meng liggies met meel. Skep lepels vol bo-op vleis in pot. Moenie die deksel oplig vir ten minste 10-12 minute, terwyl die kluitjies kook nie.

Ek luister mos een Saterdagoggend na Amore Bekker op RSG waar sy 'n onderhoud voer met Braham van Zyl. Ek kontak hom toe en is nou op sy poslys, hier volg een van sy vertellings. Kontak hom gerus en vra om op sy poslys te kom. (Eposdres onderaan die artikel) Hy beoog om 'n gereelde nubrief uit te stuur.

Suid Afrikaanse agterpad reisnotas - versamel deur Braham van Zyl

MIDDELPOS - Hantam, Noord-Kaap Provinsie
Middelpos is nou rêrig tussen nêrens en êrends geleë. Dis ‘n dorp op ‘n plaas. Die beste van als is dat die hele dorp aan een mens behoort.
Om daar te kom moet jy die R354 grondpad vat. Jy kan dit óf vanaf Calvinia, óf vanaf Sutherland nader. En as jy baie tyd en moed het, kan jy dit vanaf die Ceres-Karoo se kant oor die Ganagapas nader.
Die plaas Stinkkuil was een van die eerste plase wat in die Suidelike Roggeveld streek aan Europese setlaars uitgegee is. Lucas Visagie was die eienaar. In 1860 het Daniël Tomlinson ‘n deel van die plaas van een van Visagie se erfgename, Jan Nel gekoop. Hy het ‘n handelspos daar gevestig en dit Middelpos genoem, want op 80 km was dit net mooi halfpad tussen Calvinia en Sutherland.
Die Sher familie het Middelpos van Tomlinson gekoop. Die handelspos het in hulle tyd geleidelik tot ‘n klein dorpie ontwikkel wat die hele boerderygemaanskap in die veraf geleë wyke van Ceres, Sutherland, Williston en Calvina bedien het.
Kobus van der Westhuizen is vandag die eienaar van hierdie dorpie. Sy skoonma, tannie Mattie Wright, is in beheer van die hotel met sy agt kamers. Sy sê sy kook die heerlikste boerekos. Sy en haar man het Middelpos in 1980 gekoop. Hulle het voor dit die Golden Egg kitsrestaurant langs die N1 by Laingsburg gehad.
Volgens Tannie Mattie is Middelpos ‘n lewendige “dorpie”. Daar is ‘n skool, ‘n polisiestasie, ‘n tronk, die hotel, ‘n winkel, ‘n garage en ook ‘n poskantoor.
Stedelinge kom selfs daarheen om konferensies te kom hou. Hulle gebruik die DKW saal daarvoor, synde ‘n saal vir Dans, Kerk en Werk te wees. Dit lyk asof Middelpos net die plek is om ver weg te kom van die stadsgewoel, sonder om te afgesonder te voel.
‘n Websoektog op www.google.co.za toon dat daar ook sommer ‘n hele aantal gasteblyplekke in daardie geweste is. Kontak Middelpos se mense by 027 341-2507.


Deur: deur Braham van Zyl
Posbus 1259, Durbanville, 7551
Faks 021-975-4466
Sel 082-457-0019

Skryf vir Braham en vra om op sy poslys geplaas te word en ontvang sy reisbeskrywings direk van hom af! e-pos : info@explore-sa.com

Luister elke Saterdagoggend net na die agtuur nuus op die Afrikaanse radiodiens van RSG na Braham van Zyl en Amore Bekker se agterpad geselsies op die program Brêkvis met Bekker.

Laat jou wildste drome waar word, kry 'n kaartjie in die UK Lottery, klik net hier  Die boerpot is gereeld om en by  £11 miljoen, ( R140,000,000), sjoe, dis darem maar baie nulle!!

Peterjasie se Groot Afrikaanse Rate- en Resepte Versameling

Die ideale geskenk en versamelstuk

Ek het besluit om al my belangrikste eBoeke saam op een CD te sit om dit makliker te maak om te versprei. Die CD bevat:
Tradisionele Suid Afrikaanse Resepte wat op my webwerf is
Suid Afrikaanse Boererate (naastenby 2000)
Kampkosresepte
Wille Samies (honderde idees vir toebroodjies, oopbroodjies en jaffels

Koste per CD is R100 posgeld in SA ingesluit. (R130 as ek dit per Fastmail stuur) Dit maak 'n ideale geskenk, en ek sal die ontvanger se naam op die CD etiket sit, bv. Aan Johan van die Smit gesin.

Klik hier vir betalingsbesonderhede

Nog 'n OU resep:
Hierdie klink na 'n bak idee, limonade in poeier vorm.

Lemonade Poeier

4 lb gestampte wit suiker,  1 ons citric acid of tartaric acid, telepel fol limoen oli. Meng alles mooi droog, 3 gelyke telepels fer 'n glas water.

ePos Vriende - In die ou dae voor die internet het ek vele penvriende regoor die aardbol gehad. Jy moes weke wag vir 'n antwoord op jou brief! Vandag, met ePos gaan dinge sommer blitsvinnig! Mens moet egter in baie gevalle betaal om jou naam op 'n penvriend lys te kry. Ek glo nie daarin om vir vriendskap te betaal nie, dus gaan ek 'n gratis "ePos Vriende" afdeling begin. Al wat jy hoef te doen om jou gegewens op die lys te kry is om HIER te klik en jou besonderhede in te tik. As jy soek na 'n vriend, klik HIER en gaan deur die lys en stuur 'n epos aan iemand met wie jy wil korrespondeer,
so maklik soos dit!

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

Fokus op een deug

Wanneer ‘n mens by ‘n boekwinkel soos CNA of Exclusive Books instap is daar letterlik talle boeke op die rakke wat oor motivering, inspirasie en sukses gaan. Dink maar aan boeke soos “The Power of Positive Thinking” deur Norman Vincent Peale en “It’s Time for your Comeback” deur Tim Storey om maar net twee te noem.

Nou is my vraag: Hoekom gaan dit steeds so ellendig met der duisende mense wanneer motiveringsboeke – waarvan talle topverkopers – beskikbaar is?

Is die fout by die inhoud van die boeke? Nee, ek glo nie dis die geval nie. Sekerlik is daar boeke wat beter is as ander. En sekere boeke sal sekerlik meer by jou waardes, norms en agtergrond aanklank vind, maar ek dink daar is twee belangrike redes vir die antwoord op my vraag.

Die eerste rede is dat hoewel die boeke en inligting beskikbaar is, lees mense nie die boeke nie. Ek dink der duisende mense lees eenvoudig nie genoeg nie, en wanneer hulle lees, lees hulle boeke wat nie veel waarde vir hul menswees en rigting vir hul lewe het nie. Sommige mense verkies om voor die televisie te lê waar hulle met die minste inspanning vermaak kan word – dikwels met gemors wat weining sin en waarde bied.

‘n Tweede rede is mense lees ‘n boek wat hul inspireer, maar weet dan nie waar om te begin om hul lewe positief te verander nie. So hulle lees een motiveringsboek na die ander, maar dis asof daar nie betekenisvolle aksiestappe en groei plaasvind nie. Ek dink mense word soms oorweldig deur te veel kennis op een oomblik, te veel idees en oormaat raad en instruksies om te volg.

Ons moet leer om op een aspek te konsentreer en dit enduit te volvoer.

Ek het een keer gelees dat Benjamin Franklin ‘n lys van 13 eienskappe / deugde neergeskryf het wat hy waardevol ag, maar waaroor hy nie oor beskik het nie. Wat Franklin gedoen het was slegs om aan een eienskap op ‘n keer te werk totdat hy dit bemeester het. Al het hy nie aanvanklik daarin geslaag om die een eienskap dadelik reg te kry nie hou hy egter vol tot hy suksesvol was om dit onder die knie te kry. Hy het gefokus om slegs daardie een eienskap sy eie te maak, en homself nie oor die ander 12 bekommer nie. Uiteindelik het hy daarin geslaag om al 13 eienskappe te wen en te baas te raak. Benjamin Franklin het ‘n groot staatsman, skrywer en wetenskaplike geword. Hy het ‘n leiersrol vervul in die VSA se strewe na onafhanklikheid. Ook was hy uitvinder van vele uitvindings, onder andere bifokale brille en die weerligafleier.

Onthou jy nog hoe werk die skoolsisteem. Jy moet eers die werk van een standerd bemeester, eksamen daaroor skryf en dit slaag voordat jy na die volgende standerd bevorder word. Jy kan nie dadelik matriek gaan skryf nie – die leer van sukses word trappie vir trappie geklim.

So ek wil voorstel dat jy ophou rondspring van een ding na die ander, van een aktiwiteit na die ander. Identifiseer een eienskap of vaardigheid wat jy graag wil bemeester. Fokus daarop met al jou energie, gedagtes en tyd totdat jy dit suksesvol jou eie gemaak het. En dan pak jy die volgende deug, vaardigheid of taak aan.

‘n Sprankie wysheid vir die dag

“God lei ons nie deur die bekendmaking van omvattende bloudrukke vir ons lewe nie, maar deur ons stadig stappie vir stappie vorentoe te laat beweeg. Ons kan nie meer getrou aan onsself wees as om ons voluit tot hierdie proses te verbind, en met al die emosionele veranderinge wat dit meebring nie.” - M. Blaine Smith

Dr ST Potgieter
Tel: 021 949 5007
Sel: 083 227 3683
Epos: st@pitkos.co.za

Webwerf soeklig

My Webwerf se Soekenjin

'n Tikkie Humor

Die Resep(te)

KAAS EN HAMTERT

30 ml botter
30 ml koekmeel
10 ml gegeurde seesout
'n knippie rooipeper
5 ml droë mosterd
375 ml karringmelk
250 g ham, of weense worsies in dun repies
250 ml cheddar kaas, grof gerasper
30 ml fyn gekapte pietersielie
3 eiers, geklits
pasteideeg

Bak die pasteideeg 10 minute sonder vulsel by 220 C. Verhit die oond tot 180 C. Meng die botter, meel, sout, rooipeper en mosterd oor lae hitte. Roer die karringmelk by en meng glad. Roer en kook 2 minute, verwyder van die hitte. Laat effens afkoel. Roer die ander bestanddele by. Skep die vulsel in die vooraf gebakte pasteikors. Bak 45 minute tot mooi bruin en pofferig.

CREMORATERT

500 ml Cremora
250 ml warm water
1 pakkie beskuitjies, gekrummel
125 ml botter of margarien;
397 g kondensmelk
125 ml suurlemoensap.

Voeg Cremora by warm water en klits tot opgelos. Laat oornag in yskas. Meng krummelbeskuitjies met botter of margarien en druk vas in 'n tertbord van 27 cm in deursnee. Plaas in yskas. Klits kondensmelk by Cremoramengsel. Roer suurlemoensap by totdat mengsel verdik. Skep vulsel eweredig op kors en plaas in yskas.
 

Vriende van Boeremusiek

Kalie de Jager

Tel.: 012 5485654
Faks.: 012 5485654
Sell.: 0825788907
E-pos: kalie@telkomsa.net
Webblad: http://kalie.boeremusiek.net

VOLKSDANS

Geagte Ouer / Belangstellende

Hier is ’n geleentheid wat enige Graad 5 en selfs ouer kind moet aangryp om twee redes:

1. Leer hoekom ons dans, hoe om te dans en waar die mense voor ons geleer het om te dans
2. Dis VET PRET

Ek bied graag hierdie kursus vir die kinders aan deur die loop van die naweek en skep ook ’n vertoon geleentheid tydens ’n piekniek aan die einde van die naweek waar die ouers genooi word om te kom kyk wat die kinders gedoen en geleer het.

Gedurende die teorie sessies word dansetiket ook aangeraak wat vir die kinders baie waardevol sal wees soos hulle ouer word. Dit is dus nie net bloot ’n „geskiedenis-les“ wat oorgedra word nie.

Datum: 12 – 14 Januarie 2007

Plek: Voortrekker Monument Piekniekterrein
Kinders slaap in tente.

Kostes: R130,00 per persoon
- R60 deposito of volle bedrag betaalbaar by inskrywing
(faks bewys aan Hannetjie du Toit by 086 611 9545)
- R70 betaalbaar by aanmelding

Sluitingsdatum vir inskrywings: 10 Januarie 2007

Vir inkskrywingsvorms en „saambring brief“, kontak Hannetjie du Toit
Epos: hannetjie.dutoit@sanlam4u.co.za
Sel: 084 652 8061

Program:
Ons begin stiptelik 18:30 die Vrydagaand (12 Januarie 2007) en sluit 13:00 die Sondag (14 Januarie 2007) af.

Ons gaan verskeie nuwe danse leer en om al waarde uit die kursus te kry moet die kind sover moontlik die hele program bywoon.

Lede van Die Voortrekkers wat die kursus meemaak, werk vir ’n spesialisasie (’n toekenning wat, indien hy/sy slaag, kan ontvang. Ek wil egter nie-Voortrekkers ook betrek by hierdie aksie wat uiteindelik tog handel oor die uitbou van ons Afrikaner kultuur.

Ter inligting aan nie-Voortrekkers: Hier is die voorbereiding en navorsing wat elke Voortrekker moet doen voor die aanvang van die naweek:

Voorbereiding

Soos aangedui in die uiteensetting van die Volksdans spesialisasie, moet elke jeuglid:

1. Inligting versamel en die bronne verskaf van:

- ten minste een gedig waarin daar na dans verwys word
- twee uitdrukkings, met hulle betekenis, opspoor wat met dans te doen het
- twee van die onderstaande lande en inligting en prente oor hulle kleredrag tydens hulle volksdanse versamel:

Griekeland Pole Duitsland Spanje
Italië Holland Skotland Frankryk

2. Hierdie inligting moet in ’n netjiese gebinde vorm, met sy/haar naam en kommando daarop aangedui, ingehandig word tydens aanmelding op die kamp. Hierdie werkstuk moenie bloot net internet gedrukte stukke wees nie. Die jeuglid moes dit ten minste self deurgelees het, anders is die versamel daarvan nutteloos. ’n Paar van hulle kan gevra word om bietjie te vertel wat in sy/haar werkstuk staan.

3. Die res van die teorie sal deur die loop van die naweek oorgedra word.

4. Na afloop van die kamp, sal die betrokke kommandos in brief ontvang met die name van die jeuglede wat die spesialisasie verwerf het waarna die kentekens deur die kommando aangekoop kan word en saam met die bywoningsertifikaat uitgedeel kan word.

Indien dit vir u klink na pret en u kind/kinders belangstel, skakel gerus vir Hannetjie (inligting bo) of kom maak sommer net ’n draai by die monument daardie naweek en kom maak kennis.

Sien uit daarna om u te ontmoet.

Groete
Danette Smith
Kursusleier; Volksdans Spesialisasie
 

Die Danville Hulp Groep

Kyk asseblief of julle vir Elsabe op een of ander manier kan help?- Peter

Besoek gerus hulle webwerf: www.danvillehulp.co.za

Goeiemôre vriende,

Met die jaar nou behoorlik op sy rug, voel dit asof 'n mens nou sal moet uithaal om by te kan bly!


Met ons Kersfees projekte gaan dit relatief goed - Baie dankie aan die persone wat hulp aangebied en belowe het.
Ons kort egter nog honderde geskenke! Maar ek glo en vertrou dat ons alles teen die einde van die maand gaan inhê.

Vir die ondersteuners wat nog nie kans gehad het om 'n ernstige gedagte hieraan te gee nie - daar is nog tyd GROOT asb .
'n Geskenk se waarde moet nie meer as R70 wees nie asb. Geskenkies moet net in 'n plastieksakkie geplaas word.
Daar is groepe wat die verpakking hanteer. Ongelukkig is dit so dat 'n mens maar deur al die geskenkies moet gaan
want party mense se emosies raak op hol en dan koop hulle heelwat meer en duurder geskenke. Die geskenke moet
almal min of meer dieselfde waarde wees - om regverdig te wees.

Ons het ook 1000 lekkergoedpakkies nodig asb.!! (Ja dit is presies hoeveel!!) Indien daar mense is wat kan hiermee kan help sal ek baie bly wees. 'n Pakkie bevat:- 1 Plastiekbotteltjie koeldrank, aartappelskyfies, pakkie springmielies, fizzers, suigstokkies, koekies en enige ander gemengde lekkergoed. Dit moet nie duur lekkergoed wees nie asb.

Indien die ure in die dag te min is om nog te gaan inkopies doen sal 'n geldjie ook baie welkom wees asb. Merk dit asb net duidelik -
Kersfees 2006

ALGEMEEN

By al die projekte gaan dit maar aan. Ons voorsien nog elke dag kos en ander lewensmiddele. Die nood word groter, 'n mens lees
van soveel werksgeleenthede wat geskep is! - maar ek wens iemand wil iets in die Weste van Pretoria begin sodat ons mense ook baat
daarby kan vind!!

Nietemin - ons moet vorentoe kyk en aanhou help! Ons het baie klere nodig asb. Enige goeie bruikbare klere en huishoudelike items is meer as welkom. Ek moet asb vra dat sovêr moontlik die artikels by my afgelewer word - ek doen die werk alleen en dit is net nie altyd fisies moontlik om oral uit te kom nie. (Ouderdom begin my nou ook inhaal!!)

Ons het nog kruideniersware vir 2 weke - Enige kruideniersware is bitter nodig en welkom - groot asb! Veral die stapelvoedsel soos
pasta, meel, suiker, blikkies vleis en groente, soya, lang lewe melk, margarien ens.

By Bloudakkies ouetehuis kry die bejaardes nog elke Dinsdag 'n heerlike bord gekookte kos. Dit het nou die hoogtepunt van elke week geword!! Sommer vroeg-vroeg begin die bejaardes al aankom vir 'n lekker kuiertjie en 'n voedsame maaltyd! Dit is so lekker
om te sien hoe hulle Dinsdae geniet - en gewoonlik is daar iemand wat hulle kom vermaak met sang of mooi musiek.


ANDEON PROJEK

Mense net toe ons "grondpad projek" begin lyk na "gelyk-pad" druk die duiwel sy snoet en kloue behoorlik in!! Iemand het gaan kla
en ons het kennis gekry om die houthuisies te verwyder!! 28 dae tyd hiervoor.

Ons het nou aansoek gedoen om die perseel te hersoneer na 'n "Mission" . Elle lange pleitbriewe geskryf en Arnold het almal wat moontlik invloed mag hê persoonlik gaan sien! Ek glo natuurlik dat alles sal regkom!

So as julle een aand op die nuus vir my sien "toi-toi" voor die plot - moet julle net weet!!!! Ons sal veg vir die voortbestaan van hierdie projek. Waar gaan hierdie 30 mense heen? Daar is nie 'n manier dat ons sal tou op gooi nie - maar bowe-al weet ek dat die HERE
sal voorsien. Is ons leuse dan nie uit Mattheus 25 nie? "Ek was 'n vreemdeling en julle het my gehuisves"

Onthou asb hierdie projek in julle gebede.

Mooi loop tot volgende keer.

Elsabe


Bankbesonderhede:

Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen
Tel 012 991 3914 Sel 082 8282 551
E.pos - elecnet@mweb.co.za
Webwerf: www.danvillehulp.co.za
PS Bel asb voor jy ry
 

Boereraat van die Week

Afrikaanse Lied

Snuffelhoekie

Skooltake??
Klik hier

Soek jy plek om te gaan kampeer? Klik dan hier!

Druk jou speld op my besoekerskaart!

Kontak - Teken in/uit