Nommer 81

Afrikaans KOOK!!!

7 Des 2005

Kersfees is nou net om die draai, dis eintlik bietjie laat, maar in die brief het ek 'n paar Kerskoek resepte. so gaan kyk by die resepte hieronder en spring aan die bak!

Amper die einde van die jaar, die maande het darem omgevlieg! Is daar van julle wat in die Alberton omgewing woon? Al lus gewees vir 'n lekker boerierol? Ons ry vanoggend op Heidelberg weg uit en net buite Alberton verby Lindsay Saker VW aan die linkerkant van die pad is daar 'n ou wat boerierolle verkoop, sy naam is Richard. Dit was nou die lekkerste sappigste wors wat ek in 'n lang tyd geproe het. Doen julle self die guns, hou stil en vang 'n proe. Van nou af stop ons elke keer daar!

As julle enigsins belangstel in Boeremusiek en in Gauteng woonagtig is, dan is hierdie net die ding vir jou! Hou die 10de Desember oop en kyk na ondertoe wat dan gaan gebeur!! Sien julle by die Monument! 

Elsabé en haar Danville Hulpgroep het 'n reusetaak wat voorlê, hulle moet honderde Kerskospakke regkry om voor Kersfees uit te deel, gaan kyk verder ondertoe of julle haar dalk op een of ander manier kan help.

Dis nou al amper te laat om 'n Kersgeskenk aan geliefdes of vriende oorsee te pos. Hier is egter 'n uitweg vir julle. Stuur 'n eBoek met om en by 2000 Boererate (in Afrikaans) per epos! Koop een boek en stuur dit per ePos aan al jou vriende en familie. Dis 'n unieke geskenk en hulle sal dit geniet om al die outydse rate te lees (en dalk nog uit te toets ook). En dink net, jy betaal geen posgeld nie! Om te bestel, klik net hier.

En wat van 'n eBoek met Tradisionele Suid Afrikaanse resepte (in Engels) vir oorsese familie en vriende? Bestel weereens net een boek en stuur dit aan al jou kenisse per epos! Dink aan die posgeld wat jy gaan bespaar!
Klik hier om te bestel.

Ek het nog ander interessante eBoeke ook, sommige gratis, ander nie, gaan kyk gerus

Hier is nog een van Minette se artikels. Minette is verbonde aan die Republikein, die enigste Afrikaanse dagblad in Namibië. Minette ontvang graag kommentaar per epos. Sy wag angstig om van julle te hoor!

Om te ‘too’ of nie te ‘tattoo’
 Minette Brink

DIE woord ‘tattoo’ is afgelei van die Tahitiese woord ‘tattau’ wat ‘om te merk’ beteken en was die eerste keer aangehaal in die joernale van die ontdekker, James Cook, tydens ‘n ekspedisie wat hy in 1769 na die Suidsee gelei het.
Aangesien tatoeërings in Europese en Amerikaanse samelewings as eksoties beskou is, het getatoeëerde Indiane en Polenesiërs in die 18e en 19e eeue skares na sirkusse en kermisse gelok.
Tog is daar wetenskaplikes wat glo dat die merke op die vel van die “Ysman”, ‘n gemummifiseerde lyk wat uit 3300 v.C. dateer, tatoeëerings is, wat dit die oudste bewys van dié kunsvorm maak.
Tatoeërings wat op Egiptiese en Nubiese mummies gekry is, dateer van voor 2000 v.C. en klassieke skrywers maak melding van die praktyk met verwysing na die Grieke, die antieke Germane, die Galliërs en die antieke Britte.
Tatoeëring het verskillende betekenisse in verskillende kulture.
In die vroegste tye was versiering die algemeenste rede vir dié gebruik en is dit vandag nog die hoofrede waarom mense hulself laat tatoeëer, maar in sekere kulture het die merke gedien as indentifikasie van die draer se rang of status binne ‘n groep, soos die antieke Romeine wat slawe en kriminele op die wyse gemerk het.
Tahitiese tatoeërings dui op deurgangsrituele wat die geskiedenis van die draer vertel, byvoorbeeld wanneer ‘n seun volwassenheid bereik of wanneer ‘n man getrou het, is spesifieke tekens vir elke geleentheid aangebring.
Matrose het tatoeërings tydens hulle reise na eksotiese verafgeleë lande versamel om as aandenkings te dien, byvoorbeeld ‘n draak wat wys dat die matroos in China diens gedoen het, en gevolglik het tatoeëerwinkels in hawestede wêreldwyd begin verskyn.
Die vroegste tatoeëermetodes het gewissel van skrape in die vel waarin kleurstof soos roet gesmeer is tot prikmerke wat met skerp voorwerpe van been of hout gemaak is.
In hedendaagse tye word tatoeëermerke geskep deur ink onder die vel in te spuit met ‘n naald wat aan ‘n handbewerkte implement gekoppel is. Dié implement laat die naald teen honderde vibrasies per minuut op en af beweeg wat die vel ongeveer 1 mm diep penetreer.
Die ink wat agterbly, vermeng met die stabiele selle van die dermis en is, met minimale verdowing, vir die res van die draer se lewe sigbaar.
Die pynfaktor wat saam met tatoeëering gaan, moet in ag geneem word wanneer ‘n persoon dié kunswerk wil laat aanbring.
Sommige mense beskryf die gevoel as kielierig, of om geknyp te word, terwyl ander sê dit voel soos honderde bysteke of soos ‘n boor wat deur jou vel gaan.
Indien die voornemende getatoeëerde probleme met inspuitings tydens doktersbesoeke ondervind of ten aanskoue van bloed ongemaklik begin voel, is dit beter om eerder tydelike of henna tatoeërings te probeer. Dié tendens is veral in Hollywood gewild waar sterre, soos Madonna, hoog in die mode bly sonder om deur die pyn en uitgawes van permanente tattoeëring te gaan.
Die area waar jy jou tatoo laat aanbring, sowel as die grootte daarvan, speel ook ‘n groot rol ten opsigte van die pynfaktor.
Die laerug en die enkels is gewilde areas, maar dit is minder pynlik om ‘n tatoeëring op jou bors of bo-arm aan te bring, omdat daar meer weefsel tussen die vel en die been is.
Maak seker dat jy in alle opsigte gemaklik voel by die tatoeëerkunstenaar waar jy die groot (en permanente!) stap neem. Kyk of die studio skoon is en na ‘n professionele be­dryf lyk en sorg dat alle naalde voor jou oopgemaak word.
Moenie bang wees om vrae te vra nie en maak seker dat jy die versorging van jou nuwe tatoeëring noukeurig nakom. Die tatoeëerkunstenaar is veronderstel om jou hieroor in te lig, maar indien jy enige twyfel het, bel gerus jou huisdokter.
En laastens, onthou dis ‘n permanente kunswerk en wat op 18 hiper-cool is, gaan op 50 dalk so ‘n effe verkeerd lyk!

Die Amerikaners is seker die konings van bemarking van klein-en tuisbesighede. Ek het 'n eBoek raakgeloop met 12 "gatskop" idees, as julle belangstel stuur net vir my ePos en ek stuur dit per ePos. Die boek is in Engels en is 503 kb groot en in Acrobat formaat en is gratis! 'n Geskenkie aan intekenare.

Die volgende kom van Johann van Staden, 'n Suid-Afrikaner in Duitsland, stuur gerus vir hom epos al is dit net om Hallo te sê, hy hoor graag van julle!

Hallo Peter,

Hiermee nog 'n storietjie van my ervarings hier in Duitsland.
Groete van 'n goor, nat en koue Stuttgart. Het al Vrydag bietjie sneeu hier gekry, maar net so effentjies. Nou is dit net koud...

Kerrie-kuiery in koue Neuhausen
Gisteraand was ek bevoorreg om gasheer te speel vir twee kollegas van Suid-Afrika wat projekwerk hier in Duitsland doen en twee Oostenrykse Duitsers ('n kollega en haar man). Vol bravade nooi ek hulle om kerrie by my te kom eet.

Ek google vir 'n maklike kerrie-resep, en sukses - die wat soek, sal vind. Die gevonde resep lyk maklik, en ek benodig net 'n paar bestandele - weereens is Marktkauf die uitkoms. Gewapen met 'n sakvol varkvleis-blokkies, muskaat-neut, appels, en dies meer, voel ek myself gereed om die taak aan te durf. Gerrit Kritzinger bemagtig ons met 'n whiskey, terwyl Johann Bauermeister homself aan 'n 'polisie-koffie' (brandewyn en Coke) help. Ek is besig om die varkvleisblokkies te verbruin, Johann B skil en kerf twee appels, en Gerrit K skil en kerf 'n klomp uie.

Soos redelik bekend in my vriendekring, is 'n resep vir my slegs 'n breë riglyn. Ek help dus die varkverbruiningsproses aan met 'n koppie of so brandewyn - met Johann B se aansporing. Die resep beveel 'n bees-ekstrak aan, maar 'n pakkie bees-en-chilli sop moet maar instaan. Die sopmengsel word gebruik om die meel, muskaatneut, geelsout (die resep sê witsout), twee lepels goeie warm kerrie-poeier, en 'n ietwat meer swartpeper as wat aanbeveel is, te meng. Dit word saam met die vleis gevoeg. Daarby 'n bietjie müesli (my innovasie), 'n lepel appelkooskonfyt (my innovasie), 'n lepel grondboontjiebotter (my innovasie), genoeg knoffelvlokkies (my innovasie), en 'n lepel heuning (ek het nie bruinsuiker nie), gevoeg. 'n Blik Italiaanse tamaties en 'n handvol rosyntjies voltooi die proses.

So vir bietjie meer as 'n uur prut hierdie poging op lae hitte op die stoof - Pieter Pieterse sou gesê het 'simmerreer...'

Die tafel word gedek, 'n paar blikke mielies en 'n bottel beetslaai gebeur, lekker Duitse broodrolletjies op die tafel, 'n bottel Italiaanse rooiwyn raak deel van die pret, en na 'n ruk probeer ek 'n klomp pasta in die drukkoker gaarkry. Soos altyd spuit meer kokende water as stoom uit, en bemors die hele stoof en muur. (Pasta is nodig omdat ek net nie die rys reg gekook kan kry nie...)

Johann B speel Steve Hofmeyer se Neil Diamond CD, en toe nog 'n keer. Die kerrie-poging is 'n reuse sukses, en 'n bottel Chiliaanse rooiwyn kom en gaan, en later ook 'n bottel Franse rooiwyn. Maar nou ja...

Edith berei die nagereg ('chocholate mouse' en naartjies) voor, en ons kuier 'n hond uit 'n bos uit.

Oplaas spring die gaste in met 'n verwoeste poging om die kombuis te red, en uiteindelik raak dit stil in die woonstel. Ek was toe maar die potte en bakke nadat die bietjie oorskiet in my geliefde margarien-bakkies in die yskas gebêre is, en ek raak rustig.

Maar niemand het gesê dit is maklik nie...

Die resep, vir die wat belang stel :

PORK CURRY HOT POT

2 lbs. lean boneless pork, cut into 1" cubes
2 tbsp. shortening
1 1/2 c. sliced onion
2 c. peeled, chopped apples
3 tbsp. flour
1 tsp. salt
1 or 2 tsp. curry powder (hopeloos te min ; volgende keer is dit 3 of 4 lepels...)
1/4 tsp. pepper
1/4 tsp. nutmeg
1 (10 1/2 oz.) can beef broth
1 (1 lb.) can tomatoes
1/3 c. raisins
2 tbsp. brown sugar

Brown pork cubes in hot shortening in large skillet (onthou die koppie brandewyn ook...)

Add onion and apple; cook until onions are tender (net so...)

Blend in flour, curry powder, salt, pepper and nutmeg (sommer die knoffel hierby....)

Add beef broth, tomatoes, raisins and brown sugar ('n bietjie chilli's by sal dit beter maak...)

Cover and simmer until meat is tender, about 1 1/2 hours (ten minste...)

Serve over fluffy rice (dit is te sê, as jy rys kan kook - anders pasta...)

Serves 6 (Dit is nie waar nie - dalk genoeg vir 4 mense...)

Groete,

Johann

 
Suid Afrika se nuutste en beste soekenjin

Dis doodmaklik om 'n kaartjie vir die UK Lotto te koop. Die boerpot is selde minder as R10 miljoen en gereeld naby die R90 miljoen!! Klik hier en kry jou kaartjie! Jy kan nie wen as jy nie in is nie!
Boerpotte is gereeld £5 miljoen of meer, dis darem 'n allemintige klompie Rand!

st se weeklikse pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

Wat gaan jy hierdie Desember doen?

Wel, ek dink daar is so ‘n paar dinge wat ek gaan doen:

§ Ek gaan my ernstigheid opsy skuif, en ‘n slag meer gemaklik en vriendelik wees. Ek sal mos rede hê, daar is ‘n vakansie-atmosfeer in die lug, die son en see en strand is hier om te geniet. Ja, kom ons wees ‘n slag weer mens, ons lag ‘n slag, gooi ons maskers en fronte af en geniet dit net om te lewe. Die lewe is kosbaar, en nog ‘n Desember is tot ons lewe toegevoeg. Kom ons gryp dit en maak die beste daarvan.

§ Ek gaan nie te oordaad eet en drink nie. Nee, eerder oefening doen, en gesond lewe. Eerder lekker fiks terugkom om 2006 vas te vat en die beste van volgende jaar te maak. Hierdie uitspattigheid van alles oordoen, neem in elk geval die plesier uit die lewe. Geniet alles voluit, maar bewaar jouself en hou jou goed in stand. Bly fiks en gesond, sodat ons slaggereed is vir alles wat voorlê. Ek het reeds in my vorige nuusbrief vir jou gesê ek het ‘n kriewelrigheid in my murgpype dat 2006 ‘n groot, ‘n fantastiese jaar gaan wees.

§ Desember is ook ‘n wonderlike tyd vir oorpeinsing en nabetragting van jou lewe. Miskien so ‘n bietjie tyd afsonder net om te dink, en om my geestelike lewe reg te kry. Desember is ‘n goeie tyd om myselwers weer agtermekaar en in orde te kry.

§ Dan gaan ek een swak punt van my identifiseer en dit volgende jaar die ban indoen. Ek dink eintlik ek weet al wat dit is – ek is so ongeorganiseerd. Gaan meer orde in my lewe kry. Wat is die een swak punt wat jy wil verander?

§ En ek gaan so ‘n paar planne maak vir die nuwe jaar, kan tog nie 2006 ingaan en dinge laat gebeur sonder planne nie. Hoe lyk dit met jou – het jy ‘n klompie idees?

§ Hierdie vakansietyd gaan ek fokus op positiewe lekker dinge en die negatiewe goed uitban uit my lewe. Negatiewe dinge, slegte goed wat mense sê, krap jou net om. Fokus op die positiewe, praat en kuier met positiewe mense, doen positiewe dinge. Dan gaan jy goed voel, reg voel.

Betaal jy teveel vir motorversekering?  
Klik hier vir 'n gratis aanlyn kwotasie!
Al wat jy dan moet doen is om te besluit wat om met die ekstra geldjie te maak
 

Webwerf soeklig

My Webwerf se Soekenjin

'n Tikkie Humor

 
Koos stap eendag by sy dokter se spreekkamer in en kla dat hy dink dat hy dalk 'n lintwurm het.
Die dokter het hom deeglik ondersoek en ewe deeglik saamgestem.
Dokter: "Ek wil he jy moet more terugkom om jou behandeling te begin,en
ek wil he jy moet vir my 'n piesang en 'n koekie saambring."
Koos is effens verward, maar doen maar wat die dokter se . Die volgende
dag is hy terug met sy piesang en sy koekie.
Dokter: "Uitstekend, trek nou asseblief jou broek uit en buk vooroor.
Dit gaan niks seermaak nie."
Nou ja, wat kan hy doen? Hy trek sy broek af, buk vooroor en die dokter
druk die piesang in waar dit eintlik nie hoort nie. Hy wag 'n minuut -
presies 60 sekonde later volg die koekie die pad van die piesang.
Dokter: "Nou ja, dit was die eerste deel van jou behandeling. As jy wil he dit moet regtig werk, kom more terug met nog 'n piesang en nog 'n koekie."
Arme Koos is daar weg met trane van pyn en vernedering in sy oë, maar die volgende dag is hy terug; piesang, koekie en al. Presies dieselfde gebeur op dag twee, dag drie en dag vier . . . Eers die piesang, dan die koekie .
En so gaan dit vir 'n hele week lank aan. Dokter: "Veels geluk, more is jou heel laaste behandeling. Ek wil graag he jy moet 'n piesang en 'n hamer saambring."
Koos (bang verby; wil nie eens dink waarvoor die hamer is nie): "Nie 'n koekie nie?"
Dokter: "Nee, 'n hamer."
Die volgende dag is Koos terug - met sy piesang en sy hamer.
Dokter:"Nou ja, meneer Van der Merwe, jy ken nou al die roetine. Broek uit, buk af. Die dokter druk die piesang op, kyk op sy horlosie en tel die hamer op.
Een minuut gaan verby. Twee minute gaan verby. Drie minute. En uiteindelik na vier minute.... druk die wurm sy klein koppie by Koos se alie uit en skree:.............

"Waar's my f**en koekie!!!??"

Die Resep(te)

Wat is Kersfees sonder 'n lekker Krismiskoek? Probeer gerus een van die resepte hieronder! Dit kom uit OU respteboeke.

SPESIALE KERSKOEK

240 g Brasiliaanse neute (375 ml)
100 g pekanneute (250 ml)
75 g amandels (125 ml)
225 g dadels (grof gekap 375 ml)
75 g pitlose rosyntjies (125 ml)
75 g glansvrugte (grof gekap (125 ml)
120 g rooi en groen glanskersies (200 ml)
120 g koekmeelblom (250 ml)
2 ml sout
3 ml bakpoeier
105 g strooisuiker (125 ml)
3 eiers
12.5 ml brandewyn

Plaas neute en vrugte in groot mengbak. Sif droë bestanddele daaroor.
Voeg suiker by en meng goed. Voeg eiers en brandewyn by en meng weer
good. Skep mengsel in 'n gevoerde eenbroodpan en bak in 'n voorverhitte
oond van 150 grade C ongeveer 2 uur 30 minute tot goudbruin en gaar.

FEESTELIKE LIGTE VRUGTEKOEK

250 g botter (270 ml)
250 g strooisuiker (300 ml)
2 ml vanieljegeursel
knypie sout
12.5 ml rum
6 eiers
350 g koekmeelblom (730 ml)
5 ml bakpoeier
400 g sultanas (665 ml)
50 g gemaalde amandels (85 ml)
100 g versuikerde suurlemoenskil
100 g gepelde amandels (gehalveer, 165 ml)

Voer 'n 230 mm ronde koekpan met vetpapier uit. Verhit oond tot 150
grade C. Klits strooisuiker, botter, vanieljegeursel, sout en rum tot
lig en romerig. Voeg eiers een vir een by en klits goed na elke
byvoeging. Indien mengsel skif, voeg 12,5 ml meelblom by. Sif meelblom
en bakpoeier en meng. Voeg sultanas, gemaalde amandels en gekapte skil
by. Vou meelblommengsel liggies in romerige mengsel in. Giet in
voorbereide koekpan, rangskik amandels bo op en bak in voorhitte oond
vir 4 uur 30 minute. Toets met 'n vleispen of koek gaar is. Laat koek
vir 15 minute in pan afkoel en keer dan uit.

BRANDEWYNKERSKOEK

225 g koekmeelblom (465 ml)
knypie sout
3 ml gemaalde kaneel
3 ml gemaalde neut
450 g sultanas (750 ml)
350 g rosyntjies (580 ml)
225 g glanskersies (375 ml)
100 g gepelde amandels (gesnipper, 165 ml)
60 g versuikerde skil
gerasperde skil van 'n halwe suurlemoen of lemoen
180 g botter (195 ml)
180 g donkerbruin suiker (225 ml)
4 eiers (geklits)
25 ml brandewyn of sjerrie
50 ml brandewyn

Sif koekmeelblom, sout en speserye goed saam en plaas eenkant.
Plaas sultanas, rosyntjies, glanskersies, amandels, versuikerde en
gerasperde skil in mengbak en meng liggies. Plaas eenkant.
Klop botter tot romerig, voeg suiker by en klop tot lig en goed gemeng.
Voeg geklitste eiers bietjiesgewys by en klop goed na elke byvoeging.
Voeg gesifte koekmeelblommengsel geleidelik by en meng. Voeg
vrugtemengsel en brandewyn by en meng. Skep mengsel in voorbereide
koekpan en bak in voorverhitte oond van 160 grade C vir 2 uur. Verlaag
oondtemperatuur na 150 grade C en bak nog 1 1/4 uur. Haal uit oond,
giet brandewyn oor en laat effens atkoel in pan voor dit uitgekeer
word.

LIGTE KERSKOEK

200 g koekmeelblom (420 ml)
2 ml sout
5 ml gemengde speserye
200 g botter (215 ml)
200 g strooisuiker (240 ml)
6 eiers
50 ml brandewyn of sjerrie
100 g glanskersies (165 ml gekap)
50 g gemmerkonfyt (gekap)
50 g okkerneute (125 ml)
200 g korente (330 ml)
200 g sultanas (330 ml)
150 g'pitlose rosyntjies (250 ml)
75 g gemengde, gesnipperde skil (125 ml)

Sif meelblom, sout en speserye. Klits botter en suiker tot lig en romerig. Voeg eiers een vir een by en klits goed na elke byvoeging.
Voeg brandewyn of sjerrie by en klits goed. Voeg gekapte vrugte, neute,
skil en gesifte meelblom by. Giet mengsel in gevoerde koekpan en bak in
'n voorverhitte oond van 160 grade C vir 45 minute. Verlaag hitte tot
150 grade C en bak 1 uur. Verlaag hitte verder tot 140 grade C en bak
nog 1 uur tot gaar. Laat in pan afkoel.

OUMA SE VRUGTEKOEK

75 g ontpitte pruimedante (125 ml)
75 g droëvye (125 ml)
175 g droëpere
50 g rosyntjies (85 ml)
50 g korente (85 ml)
50 g gekapte, gemengde ski!
300 ml warm, swart tee
50 g suiker (60 ml)
3 ml gemaalde kaneel
knypie elk wonderpeper, sout en gemmer
25 ml rum
25 ml suurlemoensap
200 g koekmeelblom (415 ml)
50 g haselneute (fyn gekap)
50 g okkemeute (fyn gekap)

Suurseldeeg
25 ml melk
50 ml water
5 ml olie
5 ml droë gis
25 ml warm water
5 ml strooisuiker
10 ml sout
50 g koekmeelblom (100 ml)
50 g broodmeel (100 ml)

Versiering
25 g gepelde amandels (gehalveer)
glanskersies
engelwortel

Maak eers suurseldeeg. Meng melk,50 ml water en olie in 'n kastrol en
verhit tot kookpunt. Laat afkoel. Meng gis met 25 ml warm water en voeg suiker by. Laat staan vir 5 minute. Voeg by melkmengsel en roer sout by.
Voeg hierdie mengsel by brood-en-koekmeelblommengsel en klits goed.
Bedek en laat staan vir 12-18 uur.
Kap pruimedante, pere en vye. Plaas in 'n mengbak saam met rosyntjies,
korente en gemengde skil en giet tee oor. Bedek en laat oornag staan.
Voeg suiker, speserye, sout, rum en suurlemoensap by vrugte. Klits alle
bestanddele goed saam, bedek en laat staan vir nog 30 minute.
Voeg vrugtemengsel by suurseldeeg saam met gesifte meelblom en neute.
Meng alles goed saam en plaas in 'n gesmeerde koekpan (200 mm). Versier
met amandels, kersies en engelwortel. Bak in 'n voorverhitte oond van
180 grade C vir 1 uur 10 minute.

KERSBROOD

400 g droëpere
300 g pruimedante (500 ml)
400 g droëvye (665 ml)
150 g okkerneute (375 ml)
100 g rosyntjies (165 ml)
125 g sultanas (210 ml)
75 g gemengde, gesnipperde skil (125 ml)
200 g strooisuiker (240 ml)
15 ml gemaalde kaneel
3 ml gemaalde naeltjies
5 ml wonderpeper
3 ml sout
25 ml rum
1 kg koekmeelblom
40 g geperste suurdeeg

Brooddeeg
900g broodmeel
150 ml warm melk
25 g geperste suurdeeg
10 ml strooisuiker
5 ml sout
25 g gesmelte botter
12,5 ml olie

Week pere en pruimedante in 900 ml water. Sit deksel op en kook tot
sag. Dreineer en hou vloeistof. Ontpit pruimedante en kap pere, vye en
okkerneute. Voeg rosyntjies, sultanas, gemengde skil, suiker, speserye,
sout en rum by en bedek.
Klits 300 ml van warm water en 50 g van broodmeel saam om meeldeeg te
vorm. Bedek en laat staan vir 1 uur 30 minute.
Voeg dan warm melk by en klits goed. Meng suurdeeg, 150 ml warm water
en suiker en laat staan vir 10 minute. Voeg by meeldeeg. Voeg sout,
botter en olie by. Meng res van broodmeel by. Bedek en laat staan tot
uitgerys.
Sit koekmeelblom in 'n groot bak en maak 'n holte in middel. Klits 40 g
suurdeeg met 400 ml koue vrugtevloeistof en suiker en giet dit in
meelholte. Strooi 'n bietjie meelblom oor en laat staan tot skuimerig.
Voeg vrugte-enneutemengsel by en klits tot 'n deeg gevorm word. Laat
staan vir 15 minute. Verdeel vrugtedeeg in vier ovaal brode. Verdeel
brooddeeg in vier en rol elke deel uit tot 'n groot ovaal gevorm is.
Plaas vrugtebrood op uitgerolde deeg. Bestryk vrugtebrood met water en
draai in brooddeeg toe. Plaas op 'n gesmeerde bakplaat en verf met
water. Laat staan vir 15 minute. Bak in voorverhitte oond van 190 grade
C vir 1 uur en 20 minute.
. Hierdie gereg is nie geskik om lank te hou nie. Eet dit binne 'n week
nadat dit gebak is

SJERRIEKERSKOEK

100 g okkerneute (250 ml)
240 g Brasiliaanse neute (375 ml)
75 g amandels (125 ml) '
225 g pitlose pruimedante (grof gekap, 375 ml)
75 g pitlose rosyntjies (125 ml)
75 g glanspynappel (125 ml)
120 g glanskersies (200 ml)
120 g koekmeelblom (250 ml)
2 ml sout
3 ml bakpoeier
100 g bruin suiker (125 ml)
3 eiers
12,5 ml sjerrie

Plaas neute en vrugte in groot mengbak. Sif droë bestanddele daaroor.
Voeg suiker by en klits goed. Voeg eiers en sjerrie by en meng goed.
Skep mengsel in 'n gevoerde eenbroodpan. Bak in 'n voorverhitte oond
van 150 grade C vir 2 uur 30 minute tot gaar. Laat koek in pan afkoel
en keer dan uit.
  

Vriende van Boeremusiek

Kontak vir Wia en Kalie  van Vriende van Boeremusiek

082 578 8907 of 012 362 7097 of kalie@telkomsa.net ofwia@telkomsa.net of hoor-nou-net@yahoogroups.com

Dagsê Boeremusiekvriende.

Die jaar lê op sy rug en dit voel of daar nie genoeg Boeremusiek was die jaar nie. Maar nou ja, as mens nugter oor die saak dink dan besef jy daar was BAIE Boeremusiek deur die jaar en nog is dit einde niet!! Daar is nog twee belangrike byeenkomste voor die einde van die jaar: Die eerste byeenkoms is op 10 Desember 2005 by die Voortrekkermonument se piekniek terrein en begin om 9-uur die oggend.. Dit sal soos gewoonlik ‘n bring en braai byeenkoms wees en vure, pap en sous sal verskaf word. Toegang is R20 per persoon maar musikante wat met my vooraf reël sal gratis toegang kry. Daar word veral vir Boeremusiekgilde lede gevra om die dag te ondersteun aangesien ons graag die Pretoria tak van die Boeremusiekgilde wil re-aktiveer deur middel van ‘n nuwe bestuur. Pretoria is die mekka van Boeremusiek en daarom moet Pretoria die voortou neem in Boeremusiek aktiewiteite. Daaro vra ons baie mooi dat u Voortrekkermonument toe sal kom en kom help om Boeremusiek sy regmatige plek in Pretoria te laat kry! Boeremusiekgilde lede sal eersdaags kennis van Noordstreek kry vir bogenoemde byeenkoms. Let wel, dis nie ‘n kompetisie wat gehou word nie maar net ‘n lekker speel en ALLE Boeremusikante is welkom om te kom speel.

Die tweedee byeenkoms is op 31Desember 2005. Dis reg!, so op die ou jaar en dan gaan ons deur na die nuwe jaar met al die boeresport en boeremusiek wat daarmee saam gaan. Ons orkes vir die aand is Neels Ackerman en sy manne wat vir ons die musiek sal maak vir die oujaarsdans! Dit begin ook 9-uur die oggend en toegang sal R50 per persoon wees wat die dans insluit asook potjiekos laat middag voor die dans. Deur die dag sal daar ook vure, pap en sous beskikbaar wees. Deur die dag kan enige Musikant speel maar die aand is dit Neels Ackerman se orkes en slegs gaskunstenaars sal genooi word om te speel.

Vriende, hierdie is ‘n daadwerklike poging om Boeremusiek in Pretoria hoogty te laat vier. Kom ons vat hande en maak ‘n sukses daarvan. So sal Boeremusiek wen by die Monument wat opgerig is vir die mense wat boeremusiek oorspronklik gemaak het!!
Vir die van u wat weens omstandighede nie een of albei byeenkomste kan bywoon nie, word u ‘n geseende Kersfees en voorspoedige nuwejaar van my en Wia toegewens.

Baie belangrik is die reëlings met die tafels en die stoele. ‘n Tafel met 8 stoele kan vir die dag gehuur word vir R50. Dit moet net voor 9 Desember gereël word. Skakel my as u tafels en stoele benodig of bring u eie.

Boeremusiekgroete,
Kalie de Jager.

Wia

Tel: 012 361 7097

082 5788907

E-pos: wia@telkomsa.net

Die Danville Hulp Groep

 
Met die Kersfeesfunksies so te sê agter die rug is dit nou volstoom met die
kersfeeskospakke.

Om vir 'n gesin van gemiddeld 5 persone die basiese kos te voorsien oor die
3 dae gaan ons ± R200-00 per gesin kos. Teen 250 gesinne het ons dus R50 000-00 nodig hiervoor. Ons het dus nou dringend fondse nodig om die kruideniersware aan te koop. Die kospakke bevat die basiese kos met 'n bietjie ekstra vir die kersfeesete. Sou mens dit op deel teen 3 maaltye per dag x 5 persone werk dit ongeveer op R4-50 per persoon per maaltyd!

Indien u graag kruideniersware wil gaan aankoop sal dit ook baie welkom
wees. Kontak my dan asb by elecnet@mweb.co.za sodat ons nie dupliseer nie.

Aflewerings adres:

286 Cliffendale rylaan
Faerie Glen

Tel 991 3914 of Cel: 082 8282 551 skakel net asb voordat u ry.

Ek glo dat al ons ondersteuners hulle harte gaan oopmaak en hierdie
minderbevoorregte mense in ons gemeenskap (hoofsaaklik pensioenarisse en kinders) gaan help om kos op die tafel te hê oor Kersfees.

R4-50 per persoon per ete is waarlik so min! HELP ASB !!

Danville Hulp Projek
FNB * Brooklyn
Tjek rek: 620 546 34128
Verw: Kerskospakke

Enige bydrae gaan help om 'n verskil te maak!

Sel:  082 8282 551
Faks:  012 991 2073
www.danvillehulp.co.za
elecnet@mweb.co.za

BANKBESONDERHEDE
Danville Hulp Projek
FNB - Brooklyn
Takkode: 251 345
Tjek rek:   620 546 34128
Verw:  (Kos - of - Kersfees of dit waarvoor die donasie is asb)

webwerf: www.danvillehulp.co.za

Boereraat van die Week

Afrikaanse Lied

Snuffelhoekie

Soek jy plek om te gaan kampeer? Klik dan hier!

Druk jou speld op my besoekerskaart!

Kontak - Teken in/uit