Die Peter-jasie Patriot

Nommer 60

'n Passie vir Afrikaans

18 Februarie 05

Welkom alle nuwe intekenare!

Ek is nou 'n amptelike vriend van Vriende van Boeremusiek. Gaan kyk verder ondertoe waaroor Vriende van Boeremusiek nou eintlik gaan. (Wat is scroll down in Afrikaans? - Peterjasie) As jy enigsins 'n belangstelling het in enige asoek van Boeremusiek, maak gerus kontak met Kalie en Wia en help om ons musiek te bewaar.

Dit lyk my Minette het nuwe inspirasie oor die Desembervakansie gekry, hier is nog een van haar artikels. Minette soos julle almal teen die tyd al weet is verbonde aand die Republikein, die enigste Afrikaanse dagblad in Namibië

Oom Klaas en die Dagbreektrein

“HET jy gehoor,” suis dit in die wandelgange. “Sus en So gaan skei. En dis nog niks, So het klaar ʼn nuwe lover laat intrek.”
Ek raak lam van sulke prate. Ek is te stupid om te verstaan. Al wat ek sien is die verbete trekke om die skinderbekke en die hartseer wat swart om die verliefdes-wat-was hang, maar wat niemand ooit sal erken nie.
Want ons is daarop uit om mekaar terug te kry en te vernietig. Al vat dit tot skuins voor die graf.
Ons steek die kinders op om op Nuwe Lover te spaai en lê woorde en idees in die reeds versplinterde gemoedjies. Hoekom? Is daar werklik soveel genot te put uit venyn en weerwraak? Die lewe moet tog aangaan en is net makliker met die minimum koffertjies vol erge verlede.
Natuurlik is dit erg, so ʼn geskeiery. Natuurlik vat dit langer as lank vir die wonde om toe te groei. Natuurlik is daar dae wat die littekens onder die vel net vir jou sigbaar is.
Maar daar ís baie good times tussen in. Daar ís pêlle wat op die rêrige afdae op die stoep kom plak en beurte maak om die klokkie te lui tòt jy oopmaak. Daar ís hordes videos en musiek en partytjies en opvoerings en stokperdjies om na uit te sien. Die bottom line is om te vergewe en aan te gaan.
En as jy regtig die dag voel of jy uit jou eie kop en lyf gaan spat, bel vir Oom Klaas en gaan kuier vir die Dagbrekers. Skokterapie vir seker, maar ook die vinnigste manier om jou tot jou sinne te ruk. En jou nederig dankbaar te maak dat jy nog die keuse én die kapasiteit het om te beplan, te hoop, te weet.
En as jy gelukkig is om ʼn plek by hulle jaarlikse konsert te kry (waaraan hulle vir màànde geoefen het), dan is jy waarlik geseënd. Want ʼn Downsindroompaartjie doen die Tango met meer oemf as Al Pacino in Scent of a Woman, twee opgeskote seuns kry dit onder groot applous reg om nie een keer van die balanseerbalk af te val nie.Stokke, blikke en lepels verander in die duurste en mees ingewikkelde instrumente in die lomp handjies om musiek vir die engele te maak. En jy raak meegevoer in die ongelooflike entoesiastiese genot en vreugde waarmee elkeen van daai 77 kinders elke sekonde voel. Oom Klaas se woorde aan die einde kan jy nie anders as betraand kopknikkend beaam nie. Dis bevoorregte ouers van dié kinders, het hy gesê. Want God het hulle uitgekies omdat hulle spesiaal is.
Wanneer jy twee aande later na jou nie-Dagbreekkind se konsert gaan kyk, raak jy stil so in die geordende geraas. Jou hart wat skuins voor die gordyne oop wou-wou vergal omdat daar nie ʼn Pa is wat al dié spesiale geleenthede wil deel nie, raak sag. Want dis die mooiste kind wat daar op die verhoog staan. Die slimste en die gesondste en sy is joune. Met ʼn hele lewe wat nog voorlê. Watter droompies is daar nie in daai klein lyfie nie? Watter pyn word nie klaar weggesteek agter die haasbekglimlaggies nie? Waarom daai stukkie mens se fantasieë namens haar verpletter deur die negatiewe af te dwing? Net omdat JY te nagekom voel en JY wil terugkry? En dan voel jy hoe al die koffersvol verwyt en weerwraak skielik langs die treinspoor val en al kleiner raak soos jy voorentoe stoom.
Uit die diepte van jou hart hoop jy dat Sus en So en al hulle nuwe lovers daai trein sal hoor.
En soos Dagbrekers sal spring om die lekker van die reis na wie weet waar mee te maak.

Laat asseblief vir Minette weet per epos as jy van die storie gehou het!

Ek sal kan doen met 'n miljoen, maar wat van meer as R90 miljoen? Dis die boerpot op komende Saterdag se UK Lotto. Klik hier en kry jou kaartjie!

Ek kry die volgende ePos van vriendin, Annette en ek stem heelhartig met haar saam. Dit is hoog tyd dat mense wat omgee vir Afrikaans saamstaan en iets doen om ons taal suiwer te hou. Hier is haar brief:

Ek het dit al op RSG gesê, en daar was min entoesiasme of ondersteuning, maar van vandag af wil ek met hernuwe ywer begin, al is dit net eers hier in die Kaap, om 'n Afrikaanse spelkompetisie in die laerskole aan die gang te kry ( soos die spelling bee in Amerika). Miskien moet daar twee kompetisies wees - een vir Afrikaanse huistaalsprekers, en een vir die wat nie Afrikaans as huistaal het nie . Dit is werklik vir my 'n saak van die hart dat iemand wat in Afrikaans skryf, ten minste kan reg spel. Ek merk met groeiende ontsteltenis op dat selfs volwassenes eenvoudige woordjies nie meer kan reg spel nie. So, miskien as die kinders kan reg spel, kan hulle die ouers wys hoe om dit te doen. Het iemand van julle kontak of kennis van invloedryke sakemanne wat Afrikaans as taal sal ondersteun?

As julle ook soos Annette voel, kontak heer gerus by annette@ctnet.co.za
Hoe lyk dit met die mense in die onderwys?

Ons spandeer almal teveel oor die vakansietyd en alles word ook duurder in die nuwe jaar.  Verlig die las deur jou kort termyn versekeringspremies te verminder, vir gratis aanlyn kwotasie, klik hier!

Is skool onkostes (of enige ander uitgawes) 'n kopseer? Doen aanlyn aansoek vir 'n Barclaycard en betaal oor 'n jaar af! Doen dieselle volgende jaar!

My Webwerf se Soekenjin

'n Tikkie Humor

 Die skooljaar is weer in volle swang en dis Jannie se tweede dag op skool.

Tot sy ma se verbasing is hy 10 uur die oggend al terug by die huis.
Waarom is jy nou al terug?" vra sy ma.

"Die meneer en juffrou het gaan braai" vertel Jannie.

"Gaan braai, op 'n Dinsdag oggend wanner hulle moet werk? Hoe weet jy dit?" vra sy ma.

"Meneer het vir juffrou oor die interkom geroep en gesê sy moet haar rooster bring....toe kom ek maar huistoe want ek weet hoe lank vat 'n braai."  

Die Resep

 My vriendin, Anna Eksteen het 'n paar oulike resepte eBoeke saamgestel.
Die 5 Beste van Alle Suid Afrikaanse Resepte,
The 5 Best of All South African Dishes,
101 Poedings vir Kersfees en
101 Slaaie vir Kersfees.
Hier is letterlik honderde puik resepte en wat nog meer is, daar is geen posgeld betrokke nie aangesien hulle afgelaai kan word of per ePos aangestuur kan word. Klik hier vir meer inligting. 
Hier volg 'n resep uit een van die boeke.

WARM KORINGSLAAI

125g spekvleis                                            2 uie (grof gekap)
250g knopiesampioene(in skyfies gesny)      sout en peper
25ml olie                                                    750ml gaar stampkoring
125ml hoenderaftreksel                              50ml rosyne (opsioneel)

Braai spekvleis in 'n groot pan tot bros. Verwyder uit die pan en kap fyn. Voeg die olie by die vet in die pan en soteer die ui tot goudbruin. Voeg nou die spekvleis stampkoring, hoenderaftreksel en rosyne by. Geur na smaak met sout en peper. Prut tot goed warm en die meeste van die hoenderaftreksel geabsorbeer is. Dien warm op.
Bedien 6 mense.
 

Vriende van Boeremusiek

8 Februarie 2005 

Beste Boeremusiekvriende

Ek wil net weer 'n keer aan u presies verduidelik wie en wat Vriende van Boeremusiek is!

Nou sal u vra: "Maar waarom dan so 'n onnodige herhaling?"

Wel, bloot omdat ons gehoor het dat daar amptelik aanvoorwerk gedoen is deur die Boeremusiekgilde om hom "te distansieer van die nuwe 'beweging' genaamd Vriende van Boeremusiek!"

Hoe jammer tog want so 'n distansiëring sal nie juis veel skade kan aanrig nie omdat Vriende van Boeremusiek NIE 'n beweging, of 'n klub, of 'n formele organisasie of 'n vereeniging of enigiets in dier voege is nie! Niemand kan hom of haar dus "distansieer" van Vriende van Boeremusiek nie – ons kies self wie Boeremusiek gaan geniet saam met "Vriende van Boeremusiek"!!

Vriende van Boeremusiek bestaan uit twee persone, te wete Kalie de Jager en Wia Kotzé wat hulle weg nie oopgesien het om langer by formele organisasies en spesifiek die Boeremusiekgilde se Hoofbestuur – betrokke te wees nie. Die rede vir ons gelyktydige bedanking van die Hoofbestuur is in wese omdat glo dat ons meer kan doen vir Boeremusiek en die bewarwing van ons grootste kultuurskat as ons NIE by die formele organisering daarvan betrokke is nie. Kalie is al in elk geval lewenslank besig om die musiek te bevorder en sy liefde vir die genre uit te leef. Ek het self wonderlike ervarings (as dowe met 'n koglêre inplanting) gehad omdat die vrolike klanke van Boeremusiek my brein wat oor baie jare vergeet het hoe musiek klink - oor 'n tydperk van 18 maande gehelp het om weer sin te maak uit hoë frekwensie klank.  Beide van ons het derhalwe 'n gevoel van "dankbaarheid" teenoor Boeremusiek en wil graag terugploeg wat ons ontvang het – maar sonder die belemmernis van mense wat ons nie goedgesind is nie en veroorsaak dat ons die musiek nie meer geniet nie!

Om hierdie rede noem ons onsself "Vriende van Boeremusiek"

Ons 'n NIE'n formele organisasie nie;

Ons het NIE 'n grondwet wat voorskryf hoe u Boeremusiek moet geniet nie!;

Ons vra nie ledegeld nie!

Ons deel nie sertifikate uit om mense te verheerlik nie!

ONS GENIET NET BOEREMUSIEK EN NOOI ENIGEEN WAT DAARIN BELANGSTEL OM DIT SAAM MET ONS TE GENIET OM ONS TE KONTAK

Ons wil op eie manier Boeremusiek bevorder deur:

1.          Kontak te behou met soveel moontlik liefhebbers van Boeremusiek

2.         Te skakel met formele organisasies wat Boeremusiek bevorder indien hulle dit sou verkies. (Ons is beide steeds lewenslange lede van die Boeremusiekgilde en Kalie is ook 'n stigterslid van die TBK). Daar is steeds musikante en lede van Boeremusiekgildetakke wat ons goedgesind is en ons ondersteun graag hulle byeenkomste.

3.          Byeenkomste te reël waar beide musikante en ondersteuners hulle liefde vir die musiek kan uitleef.

4.          Boeremusiek te bevorder deur die verkoop van CD's en om interessanthede in verband met Boeremusiek bekend te maak om sodoende ook kultuuraspekte aan te spreek en te bewaar – die opstel van 'n Konsertinabewaringsregister vir Suid-Afrika is een van ons projekte wat hoë prioriteit geniet!

5.         Om gereeld kontak te maak met ons groot aantal Boeremusiekvriende van reg oor Suid-Afrika en selfs in die buiteland!

Die voormelde is maar enkele van ons doelwitte wat almal saamgevat kan word in 'n enkele mikpunt: OM BOEREMUSIEK TE GENIET!!

As ons dan nou nie formeel georganiseer wil wees nie – hoe gaan ons dit regkry?

Ons gaan:

1.      ons doeltstellings by wyse van persoonlike kontak bekendmaak;

2.      'n poslys en webblad in stand hou waar ons heerlik kommunikeer met persone wat toegang tot e-pos en die internet het;

3.      belangstellendes wat NIE sulke toegang het nie uitnooi om aan ons gefrankerde koeverte te stuur sodat ons gereelde nuusbriewe aan hulle kan uitstuur;

4.      belangstellendes vooruit in kennis stel van byeenkomste wat in 'n betrokke jaar gehou sal word – hierdie jaar het ons byeenkomste bespreek by die Voortrekker Monument vir 9 April, 11 Junie, 13 Augustus en 10 Desember. Ons vertrou dat ons in die toekoms ook die Voortrekker Monument as baken vir ons byeenkomste kan laat skitter veral omdat dit so sinomiem met Boeremusiek is!

5.      vriende en kennisse wyd en syd aanmoedig om aan wie hulle ookal wil te vertel dat ons "Vriende van Boeremusiek" is en ons entoesiasme daarvoor met almal wat die musiek terwille van die musiek wil bevorder, wil deel!

Ek hoop en vertrou dat hierdie verduideliking enige misverstande dat ons dalk in kompetisie met ENIGE Boeremusiekorganisasie is 'n nekslag sal toedien!! Al wat ons vra is: "Laat weet ons as u ingelig wil wees oor waar en hoe ons Boeremusiek gaan geniet en bevorder!! So skryf of bel of e-pos ons asseblief!! Musikante kan gerus laat hoor of hulle wil optree by ons byeenkomste! Almal is hartlik welkom!

As u 'n musikant is wat wil optree (of selfs wil leer speel) bel vir Kalie of skryf vir ons om seker te maak dat plek vir u ingeruim word by ons byeenkomste. U kan u eie orkes saambring of as u nie 'n eie orkes het nie sal daar persone wees met wie u kan saamspeel maar ons moet vroegtydig daarvan weet!

As u slegs 'n liefhebber is – maak 'n DUIDELIKE aantekening van die datums en maak seker dat u daar is om die musiek te geniet!

As u CD's wil koop of dalk CD's het wat u wil verkoop – kontak ons!!

As u ander belangstellings het wat verband hou met Boeremusiek – vertel ons daarvan!!

Kontak ons: 082 578 8907 of 012 362 7097 of kalie@telkomsa.net of wia@telkomsa.net of
hoor-nou-net@yahoogroups.com

Boeremusiek Dagboek

By die Voortrekker Monument:
9 April 2005
11 Junie 2005
13 Augustus 2005
10 Desember 2005

Ander byeenkomste:

19 Feb:
Hoëveld tak: Boeremusiekdag en -dans - Hein se Plaasoord Ermelo

26 Feb:
Port Elizabeth : Dans DF Malherbe hoërskool
Witwatersrand: Kuiersaam dag Birchleigh Hoërskool
Vrystaat: Oesdans
Manie Erasmus: Dans by Voortrekker Monument

5 Maart:
Vaaldriehoek: Vereeniging stadsaal

12 Maart:
Port Elizabeth: Dans Rowellan Park Laerskool

26 maart:
Manie Erasmus: Dans by Voortrekker Monument

9 April
Vriende van Boeremusiek: Eerste byeenkoms by Voortrekker Monument

30 April
Manie Erasmus: Dans by Voortrekker Monument

28 Mei:
Vrystaat : Witwarm winteropskopdans
Manie Erasmus: Dans by Voortrekker Monument

11 Junie
Vriende van Boeremusiek: Voortrekker Monument heeldag boeremusiekvermaak

25 Junie en verder ook elke laaste Saterdag van die maand vir die res van die jaar!
Manie Erasmus: Dans by Voortrekker Monument

30 Julie:
Vrystaat lededag

13 Augustus:
Vriende van Boeremusiek: Boeremusiek plesier vir almal!

2 September
Vrystaat en DOZI: Boeresportdag

10 Desember
Vriende van Boeremusiek - afsluitfunksie vir 2005!

Vir meer inligting, klik hier

Die Danville Hulp Groep

Hier is wat Elsabe te sê het oor hulle kleutergroepie. Kontak haar gerus as julle enigsins kan help:

Groot nuus!

Agtergrond

Ons het ons kleutergroepie middel 2004 begin onder 'n sink afdak op 'n sement vloer met 11 verwaarloosde kleutertjies.

Hierdie groepie het vinnig gegroei na 56 gretige "leerlinge"! Ruimte en fasiliteite was 'n groot probleem en redding het gekom in die vorm and Attie de Jager en die Ondersteuningsraad. Ons outjies het oorgeskuif na die Van Rensburg ouetehuis perseel en meteens was alles sommer net reg!

Twee houthuisies (sien op website) het gedien as "klaskamers" vir die outjies. Ons getroue ondersteuners het gehelp en ons kon in al hulle behoeftes voorsien. Die ouetehuis voorsien daagliks ontbyt, 'n broodjie 10 uur en 'n gebalanseerde middag-ete uit hulle kombuis vir die kleuters, waarvoor ons oneindig dankbaar is.

Attie ('n welsynwerker) oortref homself met die kleutergroep en sonder hom daar is ons verlore!.

Juffrou Maria het die groep saam met ons begin en gou was die hande net nie genoeg nie. Juffrou Elizabeth het bygekom en ook 2 versorgers, Rachelle en Marieta.

Einde 2004 het ons afgesluit met 56 oulike kleutertjies en 5 wat "gegradueer" het en nou goed aanpas in die laerskool.

en toe...............

Januarie 2005 open ons met 80 kleuters ! ! ! .

Ons was in 'n toestand van skok! Waar gaan ons met almal heen? hoe gaan ons regkom? En net toe ons nou behoorlik paniekerig raak - vererger die situasie nog meer ! - Ouers staan in rye "om hulle kindertjies ook 'n kans te gee asb"! Hoe wys jy minderbevoorregte ouers en kinders weg? ek probeer toe nog wal gooi maar Attie se hart is sag en hy laat nog 10 kinders toe!

Nou staan ons op 90 kleutertjies in 2 houthuisies van 6x4 meter groot!

Dit lyk soos nagmaal op Pofadder - kleinties en nogmaal kleiintjies die hele stukkie grond vol.! Waar jy probeer trap is daar
'n kleutertjie. Haasbekkies glimlag breed oor hierdie geleentheid om saam te kan speel en te leer!

"Tannie ons jol lekker hierso!..."Het jy vir ons swieties en ander goete gebring?" en ek voel SKAAM dat ek daaraan gedink het om van die outjies te weier.

Nou staan die sake so!

Ons het 4 personeellede wat maandeliks salaris moet kry. Huidiglik gee ons 'n meevallertjie om dankie te sê vir hulle hulp, maar ons sal vir hulle 'n "salaris" moet betaal vir hierdie ongelooflike werk wat hulle daar doen. Ons sal nog 'n onderwyseres moet kry want die getalle is te veel per persoon. Hiervoor het ons konstante fondse nodig.

Ons moes dringend nog houthuisies kry - die kleuters moes die meeste van die tyd buite wees! Dit is bloedig warm en die outjies is pootuit in die middag.

Ek het verlede week weereens met groot geloof 2 houthuisies laat oprig en het 2 weke gekry om fondse in te samel vir die betaling. Dit was onmoontlik om eers geld in te samel en dan die huisies te koop aangesien die outjies aan al die elemente blootgestel was!

'n 4X6 houthuisie met 6 klein venstertjies, 'n skuifdeur en isolasie teen die dak kos R11 000-00.

Verder het ons ook fietsies nodig vir die kleuters. Die sandpit moes verdwyn want ons moes een huisie daar opsit.

Ons moet ook 'n afdakkie oprig sodat die outjies wat buite speel darem koelte kan hê! Verder benodig ons nog apparate en baie opvoedkundige speelgoed. Verf, klei, legkaarte en al die gewone items wat 'n kleuterskool nodig het is ook nou groot in aanvraag.

Die behoeftes is nimmereindigend MAAR die beloning is so GROOT!

Onthou dat ons nou omtrent al die kleutertjies uit die Danville Kamers (waar prostitusie en dwelmhandel floreer) het en hulle nou tenminste
in die oggende tot 13:00 "veilig en versorg" is. Hulle kry genoeg kos in die oggend/middag (sou daar dalk nie kos in die aand beskikbaar wees nie) om hulle
deur te kan trek na die volgende oggend wanneer hulle 'n stewige ontbyt sal kry. (het jy al gesien hoe verslind 'n 3 jarige kind, 3 bakkies pap?.. glo my niemand wil dit aanskou nie!) Ons weet dat 'n gebalanseerde dieet lewens-noodsaaklik is vir 'n kleutertjie se ontwikkelling en sonder die ouetehuis
se hulp sou ons dit nie kon doen nie!

MAAR ons kan met dankbaarheid sê, met behulp van ons ondersteuners en hulle groot naasteliefde is NIKS onmoontlik nie! Want ons lees "Laat die kindertjies na my toe kom ...............
en hoeveel te meer het hierdie minderbevoorregte outjies ons hulp en bystand nodig?


Baie dankie aan almal wat altyd help (al versprei jy net hierdie brief - help dit ook) Indien iemand 'n bydrae tot die houthuisies se betaling wil maak, ek heg weer die besonderhede aan. Skryf net asb "houthuisie" by die verwysing.

Mooi dag en nogmaals baie dankie

Elsabe

Cell: 082 8282 551 na - ure
Huis: 012 991 3914 na-ure
E.pos: elecnet@mweb.co.za
Webwerf: www.danvillehulp.co.za

Boereraat van die Week

Afrikaanse Lied

Dit en dat....

Druk jou speld op my besoekerskaart!

Kontak - Teken in/uit