Die Peter-jasie Patriot

Nommer 29

'n Passie vir Afrikaans

7 Mei

Dagsê!

Diere is baie slimmer en het baie meer insig as wat julle dink, lees nou maar die ware verhaal geskryf deur Johan Brink, hieronder:

Ek is nou stadig besig om uit my hibernasie te kruip, en ek dag toe ek kan die nuutste vertel van my kat en my skoonma.

Kyk, die kat is nou so 7 maande oud, en hy is seker amper uitgegroei. So ’n mooi swart-en-wit [gewese] mannejieskat,  en deur almal in die huis bederf tot in die grond toe.

Deur almal nou, behalwe skoonma. Die ou tannie lê nou al 3 jaar permanent by ons tot my groot frustrasie. Sy is ’n regte misogeen: niks is goed nie, en niemand beteken iets nie, en oor elke ding kry sy iets om oor te bitch. By dit alles nog het sy ’n regte fobie vir katte. Dit is nie nou net dat sy nie van hulle hou nie, sy is genuinely bang vir katte.

Nou kry ons die klein katjie Novembermaand, en soos dit met sulke dinge gaan, is die kat die hele huis vol, spring op alles, snuif aan alles en sommer oor
die algemeen ondersoek hy nou die nuwe wêreld. So spring hy dan ook een dag op die ou tannie se bed, maar waar gaan sy nie ballisties hieroor nie. “Die kat
is op my bed! Kom haal dit af hier! Wat ’n mislike dier! Hy probeer my aanval!” En so en so en so. Ad nauseam.

Die kat steur hom egter glad nie aan die lawaai nie, en elke dag sou hy ten minste een keer op haar bed spring, en elke keer het ons die histerie.

Maar so af en toe spring hy op die bed as sy slaap; dan as sy weer haar oë oopmaak, dan sien sy daar lê die kat by haar voete. Opgekrul, sy pienk snoet op sy pootjies, en oor die algemeen die toonbeeld van tevredenheid en onskuldigheid en skadeloosheid. Dit is amper of hy doelbewus ’n projek aan die gang het om haar te probeer bekeer.

Toe so 3 weke gelede, toe gaan Katman in fase 2 van sy projek in: hy gaan elke aand by haar op die bed slaap. Laat, as sy nou al slaap en die kamer is donker, dan spring hy op die bed en krul op by haar voete.

En dit is nie sommer net ’n verbygaande gril nie, nee. Hy dring daarop aan om daar te gaan slaap. As jy hom wegdra en op ’n ander plek gaan neersit, dan woeps spring hy dadelik af en draf terug na haar kamer toe. Een aand was haar deur toe en toe sit die kat ’n groot kabaal op totdat ons die deur oopmaak en hy kan gaan lê op die bed. Soggens dan staan hy saam met my op vir
sy brekfis, maar dan gaan hy dadelik terug na die ou tannie se bed toe vir hoofstuk 2 van die slapery. As sy dan so teen 10-uur haar oë open dan is die eerste ding wat sy sien vir Katman wat prrprrprr by haar voete lê en vir haar met skreefogies bekyk. Ek dink toe dat selfs vir haar het die storie van die kat wat vir haar die hele tyd dreig begin belaglik raak.

Maar nou so met fase 2 saam het haar weerstand ongemerk en baie geleidelik begin verkrummel. Die gebitch oor die kat op die bed het naderhand heeltemal
opgehou.

En toe: so 10 dae gelede toe loop en ek Marian al pratend laat in die aand na ons kamer. En daar kom dit toe uit haar kamer uit: “moenie so raas in die gang
nie. Die kat slaap al”.

Jou wragtag.

Jy kon my omtik met ’n veertjie. ’n Veertjie, sê ek. Die-kat-slaap-al het sy gesê.

Maar dit is nog nie die einde nie: twee aande later toe is Marian besig om haar ma reg te kry vir die nag, en toe reken die ou tannie: “help nou net vir my dat
ek my voete so bietjie meer na die kant van die bed skuif. Dan is daar meer plek vir die kat en dan pla ek hom nie”. Can you believe THAT, Mavis?

Toe ......... fase 3 van Katman se projek. Vrydagaand: laat in die nag, en almal slaap. Skoonma sit-lê altyd so in haar bed met haar kop bo-op ’n stapel kussings. Marian gaan hier teen 2-uur daar loer of alles oukei is, en wat sien sy toe? Katman het besluit om nie meer by die voete te lê nie, maar hy het gaan slaap bo-op die stapel kussings tussen haar ma se kop en die muur.
Lekker lankuit; dit lyk amper of die ou tannie ’n stola bokant haar op die kussings gedrapeer het.

Marian skrik toe haar vrek, want sy dink as die ou tannie wakker word met die kat so naby aan haar, dan paas sy net daar uit. Sy wil toe die kat daar wegvat,
maar voor sy dit kon doen sê haar ma [wat die hele tyd toe nie geslaap het nie]: “Los uit die kat. Hy slaap nou lekker”.

Toe is daar nog ’n fase 4 ook, wat einlik ’n halwe antiklimaks is. Die kat het gisteraand op die bed gespring en die ou tannie se hand gelek. Sy wou toe
weet waddehel dit nou is, maar toe wys ek vir haar uit ’n boek uit: “licking one’s hand is a sign of affection”. Ek sê kyk daar, die kat wys dat hy van jou
hou.

Nou sit ek en Marian gisteraand en praat oor twee dinge wat in hierdie episodetjie uitstaan:

1. Die kat het met sy volharding saam iets reggekry wat geen mens in die onlangse verlede kon regkry nie: hy het die ou vrou se klipharde hart vermurwe. Daar is nou skielik iets wat heel ongevraag en heel onselfsugtig vir haar affeksie toon, en nou vrek sy oor die bleddie kat. Saans vra sy nou maar wanneer kom hy dan nou slaap dit is dan al so laat, en so.

2. En dan die vraag: waarom het hy dit hoegenaamd gedoen? Dit is nie dat hy aandag gesoek het of verveeld was nie, want daar is gedurig mense in die
huis, en almal gee aandag aan hom en gee kom kos, en so. Hy is nou al so bederf dat hy amper ’n mens is. By die ou tannie het hy vir die grootste deel van sy lewetjie net raas gekry en sy het die hele tyd vir hom geprobeer wegjaag. Kos of so iets het hy nooit daar gekry nie, en ek is seker dat sy nooit eers geprobeer raak het aan die kat nie.

Nou waddehel het in sy kop aangegaan? As hy nou ’n mens was sou mens kon reken hy het die ou vrou wat die hele dag daar alleen lê met min geselskap en niemand van buite kom vir haar kuier nie dalk jammer gekry.
Maar kan ’n kat iemand jammer kry? Êêêk weet nie?
 

'n Tikkie Humor

Nog 'n Gertjie grappie, spesiaal vir Minette:

Onlangs sit die diere van Afrika langs 'n Hardekoolvuur by die Olifants en stry oor wie is nou eintlik die beste in dit en dat. Na 'n ruk is Koning Leeu goed dik vir die spulletjie, en nadat hy 'n goeie sluk uit sy blikbeker gevat het, roep hy hulle tot orde.

"Kyk," sê hy vanuit die hoogte, "ek het nou genoeg gehad. Volgende Saterdag pak julle mekaar op die rugbyveld. Die groot diere speel teen die insekte en ander goggas. Sekretarisvoël sal skeidsregter wees."

Die hele week was dit 'n groot geskarrel om alles reg te kry. Spanne is gekies, en die diere wat nie betrokke was nie, het die veld reg gekry. Teen Saterdag was daar 'n feestelike stemming.

Toe Sekretarisvoël sy fluitjie blaas, was die pawiljoene gepak. Die spanne draf op onder luide toejuiging. Eers die groot diere: Heelagter
- Koedoe, Vleuels - Rooibok en Hartebees, Senters - Njala en Duiker, Losskakel - Springbok, Skrumskakel - Klipspringer, Agtsteman - Eland, Flanke - Buffel en Blouwildebees, Slotte - Kameelperd en Sebra, Stutte
- Olifant en Seekoei, Haker - Renoster(kaptein). 'n Formidabele span in enige ou se boek.

Toe die insekte opdraf, raak die skare histeries: Perdeby, Vlieg en Naaldekoker, Muggie en Muskiet, Skoenlapper, Vlooi(kaptein), Kakkerlak en Rysmier, Stokinsek en Hottentotsgod, Miskruier en Toktokkie, met Bosluis op haker.

Net voor die afskop is daar 'n verbyvlug van verskillende voëls, in 'n verskeidenheid van formasies. Nadat 'n klomp tortelduiwe seremoniëel vrygelaat is, kom 'n gompou gevaarlik laag oorgevlieg, met 'GO BUGS' onder sy vlerke geverf. Natuurlik, alles tot groot vermaak van die skare.

Van die afskop af sukkel die insekte hul vrek. Dinge wil nie vlot in die skrums nie. Kameelperd oorheers die lynstane. Buffel is genadeloos in in die losspel. Die groot diere wen elke bal. As hulle met die voorspelers dryf, is Olifant en Seekoei onstuitbaar. As hulle wyd speel, is daar geen keer aan Haretebees, Rooibok en Koedoe nie. Hulle druk drieë asof dit uit die mode raak. Springbok skop net nie mis nie. Rustyd is die telling 50-0.

Na rustyd lyk dit of Vlooi se hardpratery gehelp het. Daar is nuwe lewe onder die insekte, en hulle druk die ou groottes meters terug in die skrums. Duisendpoot wen balle agter in die lynstaan. In die losskrums gaan dit verwoed, en hulle begin daar oorheers. Die bal gaan seepglad met die agterlyn af, en Muggie, Perdeby en Naaldekoker begin die drieë inryg. Muskiet se skopskoen is dodelik. Skoenlapper dartel deur die verdediging. Duisendpoot duik die groottes disnis - selfs Kakkerlak, wat 'n stillerige eerste helfte gehad het, lak die dinges uit hul uit.

Twee minute voor die einde klits Skoenlapper 'n skepskop oor, en die telling is 51-50! Van die inskop af dryf die groot diere verwoed. Renoster kry die bal 5 treë van die doellyn af, en gáán vir die hoekvlag. Met 'n bomenslike poging duik Duisendpoot hom op die hoekvlag uit. Die eindfluitjie blaas. Die skare se vreugde ken geen perke nie.

"Waar was jy in die eerste helfte, toe ons so gesukkel het?" vra Vlooi vir Duisendpoot toe hulle afstap.

"In die kleedkamer, besig om my stewels vas te maak!"
 

Die Resep

Beesstertbroodjie

1 pak (500g) bruismeel                    1 pakkie beesstertsoppoeier
1 houer (500ml) karringmelk            125ml gerasperde kaas
knypie rooipeper

Metode:

Voorverhit die oond tot 180°C. Smeer 'n broodpan (20 x 14 x 7cm).
Meng die bruismeel, soppoeier en karringmelk goed saam. Skep die deeg in die pan en maak dit gelyk. Strooi die kaas en peper oor en bak 1 uur lank op die middelste oondrak. Keer op 'n draadrak uit en laat afkoel.
 

Afrikaanse Lied

Brokkies

Studiebeurse
Glo dit ofte nie, maar internasionale maatskappye stel  letterlik honderdduisende studiebeurse beskikbaar vir enigiemand wat wil gaan studeer! En jy hoef nie eers te soek daarvoor nie, dis alles in een gids beskikbaar. Maar moenie my glo nie, gaan kyk self!

Druk jou speld op my besoekerskaart!

Kontak - Teken in/uit